کولمبو، سری لنکا -- اے ایف پی نے جمعرات (26 اپریل) کو اطلاع دی کہ ملک کے سابق جنگی علاقے میں دو لڑکے اس وقت ہلاک ہو گئے جب وہ ایک ایسی بارودی سرنگ سے کھیل رہے تھے جو پہلے پھٹی نہ تھی۔ جنگ کے خاتمے کے بعد ہونے والی اس نوعیت کی یہ پہلی ہلاکتیں ہیں۔

فوجی ترجمان روون ونیگاسوریا نے بتایا کہ بدھ کی شام کو جزیرہ نما شمالی جافنا میں واقع پیلائی میں 4 سالہ اور 2 سالہ دو بھائی اس وقت ہلاک ہو گئے جب وہ چیز دھماکے سے پھٹ گئی جس کے ساتھ وہ کھیل رہے تھے۔

"بظاہر یہی معلوم ہوتا ہے کہ یہ بچے، افراد ہلاک کرنے کے لیے بنائی گئی بارودی سرنگ سے کھیل رہے تھے جو اس سے پہلے پھٹی نہ تھی"، انہوں نے کہا۔ "یہ بہت ہی افسوسناک بات ہے کہ اس علاقے میں بارودی سرنگوں کے بارے میں تعلیمی پروگراموں کے باوجود ایسا سانحہ پیش آیا"۔

ونیگاسوریا نے بتایا کہ ہمسایہ ضلع کیلینوچھی میں بھی اس سال کے اوائل میں پانچ بچے اسی نوعیت کے حادثے میں زخمی ہوئے تھے، تاہم کوئی اموات واقع نہیں ہوئی تھیں۔

علیحدگی پسند تامل ٹائگر باغیوں کو مئی 2009 میں فوجی دستوں کی طرف سے شکست فاش ہو جانے کے بعد فوج اور غیر سرکاری تنظیموں نے بارودی سرنگیں ہٹانے کا کام زیادہ تیز کر دیا ہے۔